ياشيخ ياللي في حضرتي غلطت باللسان
تراني ماسمح لاحد يخطي على الحناكية
ياللي تعيرنا بالدوم وتقول فيها بدوان
اعقل كلامك تراك وصلتها حدود الحمية
الدوم لاجدادنا ولنا رمز الفخر والعنوان
وماكل واحد يثبت له الأصل والهويه
أفقر فقير ان وجدته عندنا ماينام جوعان
بفضل ربي ثم من وادي الدوم بعيشه هنية
إن كان ماعنده شي ملا من الدوم خيشان
ونزل لسوق الحضر وباعه لهم بيعه رضية
ولا سوى له من جذوع الدوم سقوف وبيبان
وأتمها بلبنات الطين بيوت ساترة و علية
وإن ظمأ ورد من الحسو وصدر ريان
وأسقى حلاله وبيته و أهدى لجاره هديه
وكل هذا الكلام منه مازال وبعضه كان
والحين بعدالله حنا بخير في ظل السعودية
لكن يبقى لنا الدوم بعدالله مثل الضمان
لأيام شدة ممكن تجي في السنين الخبية
وإن كان قصدك في الكلام على أهلها الان
تراهم على ماكان اباهم وضوهم حية
وان كان بيوتنا متغيره الاشكال والالوان
ترى قلوبنا باقيه بيضاء وصافيه النيه
أما كلامك عن البدو فهم لنااحباب و اخوان
قدرهم على الراس وبيوتنا لهم ولاخوي وليه
وان ضفتهم أكرموني ووسعوا لي في المكان
وغادرتهم وأنا ودي أكرر لهم الجية
ووالله لوإن ماعندي في الجامعة امتحان
لاكتب فيهم وفيهاحتى تمل كلتا يديه
واخبرك عنها علوم كثيرة لها شان
وما أقول هذا اخر كلام لكن فيه ترى بقيه
قال الكلام رجل تغرب عنهامن ال بدران
قلبه تعلق بحب ارض و أهل الحناكية
وتراني على السكن بوسطهم شفقان
وعن دكة المرحومة(باذن الله ) في حزة العصرية
وصلوا على صاحب اخر رساله للاديان
محمد رسول الله خير البشر والبرية